“இப்போதெல்லாம் உன்னை நினைப்பதே இல்லை” என்று சர்வசாதாரணமாக நீ சொன்ன பின்பும் காதலிக்கும் மனதை தூரத்தில் நின்று, அது காதலிக்கும் அழகை ரசிக்கத்தான் செய்திருக்கிறேன் தேய்ந்து கொண்டிருக்கும் இந்த நொடி வரை. கடைசியாய் காதலோடு நீ பேசியது அந்த மணித்துளி தான் என்று தெரிந்திருந்தால் 32 விநாடிகள் மீதமிருந்தும் கோவத்தில் அவசரமாக அந்த டீக்கடை தொலைபேசியை நிச்சயம் துண்டித்திருக்கமாட்டேன். நீ இல்லாமல் போன நொடி முதலாய் தான் காதல் பழகத்தொடங்கினேன் உண்மையாக. முதன்முறை கை குலுக்கிய நேரம், முதன்முறை முத்தமிட்ட நாள், முதன்முறை நான் வெட்கப்பட்ட கிழமை என ஒவ்வொன்றையும் அசைபோட கற்றுக்கொடுத்தது தனிமை.

பின்னிரவுகளில் முந்திக்கொண்டு வரும் கண்ணீரை நீ அறிந்திருக்க வாய்ப்பில்லை. எந்த காதலனும் அழுததாய் காட்டிக்கொள்வதுமில்லை. நாம் சேர்ந்திருந்த உணவகங்களுக்கு போய் அதே இருக்கையின் அரவணைப்பில் அந்த‌ நான்கு சுவர்களுக்குள் முன் வருடம் நீ சுவாசித்த காற்றை மட்டுமே இரைப்பையில் நிரப்பிக்கொண்டு பசியாறி நான் திரும்புவதையும் நீ அறிந்திருக்க வாய்ப்பில்லை. இப்படி என் தரப்பிலிருந்து நீ அறிந்திடாத விஷயங்களை எண்ண முடியாது. உன் தரப்பில்………….. ?. இன்னொரு துணை சேர இடையில் உனக்கிருப்பது வெறும் நாட்களே. அதற்குள் ஒரு நாழிகையாவது என்னை நினைத்துக்கொள்வாயா? நாழிகையில் ஒவ்வொரு மணித்துளியும் ஒரு மணி நேரமாக மாற எங்கேனும் வழி இருந்தால் அதை ஒரு நாளாக கொண்டாடிக்கொள்வேன்.

முடிவுற்ற காதல் விசித்திரமான கூட்டணி. அது குயிலுக்கும் வெளவாலுக்கும் போடப்பட்ட முடிச்சு. குயில் காதல் முறிய காரணமாக மாறும் வேளை வெளவால் காதலுக்கு பலியாக்கப்படும். காதல் மொழி.பிரிந்த காதலர்கள் காலத்துக்கும் ஊமை ஆக்கப்படுகிறார்கள். குயில் ஊமையானாலும் அதற்கென தன் இயல்பை விட்டு விலகிய ஒரு வாழ்க்கை உண்டு. வெளவால்கள் ஊமையானால்? உன்னால் இன்று நான் ஒரு வெளவால்.

காலயந்திரம் இருந்திருந்தால்? சற்றே பின்னோக்கி போய் வாழ்வை மாற்றி இருப்பேன். ஆனால் எங்கே மாற்றம் செய்வதென தெரியாமல் இருக்கிறேன். பார்த்துக்கொண்ட நாளிலா? காதல் சொன்ன பொழுதிலா? எதற்கு வீணாய் எனது அழகான நாட்களை நானே குலைத்துக்கொள்ள வேண்டும்? வழியனுப்பிய போது திரும்பிப் பார்த்துக்கொள்கிறேன். மூளைக்கு உரைத்து விட்ட போது மனதுக்கு ஏன் புரிய வைக்க வேண்டும்? வழக்கம் போல் தொந்தரவு செய்யும் எண்ணம் இல்லாமல் கைகட்டி நிற்கிறேன். அது காதலித்து விட்டுப்போகட்டுமே! இன்றிரவு கொஞ்சம் போராட்ட‌த்துக்குப்பின் தூக்கமும் வரும் அதில் என்னையும் அறியாமல் இறந்தும்விடுவேன்.

காதல் அழிவதில்லை…
-ஸ்ரீ.

Few related Posts

• நாக்கறுந்த மணி
• திருப்பிக் கொடுக்க முடியுமா?
• பாதி நீ, மீதி நான்
• என் காதல் குழந்தை
• சொல்லாத வாழ்த்து

ShareThis